Ilir Daja, trajneri në diskutim për Dinamon

Dinamo, kampionia e re e kategorisë superiore në sezonin futbollistik 2007-2008, tashmë është pa trajner. Ka ndodhur kështu sepse Ilir Daja, tekniku që arriti ta nxirrte kampion këtë ekip, e ka të përfunduar kontratën e tij me dinamovitët. Madje qëndrimi i tij në krye të bluve varej nga rezultatet që do të kishte tekniku me Dinamon. "Kontrata e Ilir Dajës - thotë presidenti Sulaj - tashmë ka përfunduar me mbylljen e kampionatin. Ne do të ulemi të bisedojmë me të, duke shpresuar që do të gjejmë gjuhën e përbashkët për vazhdimësinë". E tashmë kanë nisur "ethet" për riformatimin e Dinamos së re, që sipas Sulajt jo vetëm do të jetë dinjitoze në Champions League, por do të vazhdojë përsëri me trofe. .

Futbollistë shqiptarë e të huaj për blutë

Sulaj ka dëshirë ta mbajë këtë skuadër. "Në pjesën më të madhe - deklaro presidenti Sulaj - skuadra do të jetë ajo që është. Ne do të ulemi të bisedojmë me ata që u kanë mbaruar kontratat e më pas gjithçka varet nga lojtarët e jo nga ne. Pra nëse do t'i pëlqejnë ofertat tona, të cilat do të jenë më të larta se sezonin e kaluar, atëherë do të jenë pjesë e jona". Realisht Dinamo llogarit si pjesë të saj, sepse i ka me kontrata dyvjeçare, kapitenin Pisha e Kulin, kurse të tjerët janë të gjithë të "ikur". Që nga portieri Kotorri, Pema, Allmuça, Abraham, Poçi, Vincetiç, Pejiç, Graniç, Bodrusiç, Diob, por dhe një pjesë e lojtarëve rezervë. Ndonëse të rinjve si Ferraj, por dhe Mile e Çaushaj, që u huazuan te Teuta, janë me kontrata 3-vjeçare. Ashtu siç ishte dhe Bizhyti me kontratë dyvjeçare, teksa iku te Shkumbini. "Dëshira ime është që skuadra do të mbetet kështu siç është. Sigurisht jemi duke menduar dhe përforcime, kur do të ketë lojtarë nga kampionati shqiptar, por dhe të huaj".

Sulaj nuk i ndaj titujt kampion

Presidenti Sulaj ka patur mendimin që ky kampionat, jo vetëm që ishte cilësor dhe i pastër, por pati dhe fortësinë. Sipas tij, skema e vendosur, por dhe dalja e katër skuadrave në kategorinë e parë e bënin kampionatin që të mos kishte lëshime. "Ndodhën të papritura të tilla në këtë kampionat, kur ne na mundi Flamurtarin në "Selman Stërmasi". Apo kur u mundëm nga Besëlidhja e Kastrioti, të cilët ishin për mbijetesë. Megjithatë me një luftë të pastër, kur duhen përmenduar që ekipe si Teuta, Kastrioti, Besëlidhja, Flamurtari bën kampionat të ndershëm, titulli kampion ishte i merituar. I dha tonin këtij kampionati dhe Shkumbini. Nuk besoj se pas asaj ndeshje të bukur me Partizanin ka gojë të flasë njeri për Dinamon. Të paktën kampi i të kuqve". Mirëpo Sulaj, që në gjoks ka dy medalje kampioni (2002 dhe 2008), i ka të vështirë t'i ndajë. "Edhe ai i 2002-it ka qenë i bukur sepse e kemi marrë kryesimin edhe duke qenë 9 pikë prapa Tiranës. Ishte grup i mirë lojtarësh, ashtu sikurse dhe ky i sivjetmi", ka përfunduar Sulaj

Gjergj Vyshka

ALPET, një dorë e mirë te blutë

Prej mëse dy sezonesh në fanellat e bluve tashmë shihet firma ALPET. Jo vetëm kaq, por të paktën dhe sipas presidentit të Dinamos, Besnik Sulaj, kjo firmë, që është kompania më e madhe e karburanteve në Shqipëri, ka ndihmuar dhe financiarisht blutë. E hapi i parë nga ALPET tashmë për një Dinamo kampione është ardhja e një autobuzi të ri. "Do të jetë ndër prodhimet e fundit dhe me kilometrazh zero, çka i shkon për shtat një skuadre kampione. Jo vetëm kaq, por dhe financiarisht ka ndihmuar. Por në pjesën më të madhe shpenzimet kanë qenë të miat". Sulaj e ka të vështirë të përmendi shifra se sa janë shpenzuar, duke premtuar që do t'i bëjë të ditura në një ditë tjetër. Megjithatë thotë që është tejkaluar buxheti në masën 10-15 përqind nga ajo çfarë ishte parashikuar. "Megjithatë, kur je kampion nuk llogaritet asgjë. Kur kemi qenë dhe korrekt me kontratat e lojtarëve, atëherë ndjehemi dhe më mirë".

Gj.V.

Abraham shtyn largimin, Diob ikën nesër

Sipas burimeve zyrtare në klubin Dinamo, Abraham Alechenu tashmë e ka shtyrë biletën e tij për ditën e enjte, teksa do të jetë për një periudhë pushim në Nigeri. Ndërkaq senegalezi Diob, gjithnjë sipas këtyre burimeve, do të largohet sot. Blutë janë duke menduar dhe për vendin e periudhës përgatitore në prag të ndeshjeve të Champions League.

Gj.V.